Garowe ( SPR ) : Lixda Urur siyaasadeed ee Puntland ayaa si rasmi ah qalinka ugu duugay Xeerka habdhaqanka ururada siyaasada Puntland,ayna goob joog ahaayeen madaxda iyo wakiilada Ururada kala Horseed,Midnimo,Wadajir,Udad,Horucad,PDP.

Kulanka lagu saxiixayay xeerkani ayaa lagu qabtay xarunta PDRC ee Magaalada Garowe,Waxaana goob joog ahaa Madaxweynaha Puntland,Ku xigeenkiisa oo ka socday Ururka Horseed iyo Madaxda kala ee Ururada siyaasada Puntland.

Gudoomiyaha guddiga doorashooyinka Puntland Maxamed Xasan Barre ayaa sheegay in guddiga doorashu ay diyaariyeen xeerka Habdhaqanka Urur siyaasadedyada si hawsha u noqoto mid socota,isagoona ka warbixiyay heerarkii kala duwan ee ay soo martay shaqada hirgalinta Ururada iyo Xeerarkooda.

Dr Saadiq Eenow oo ah gudoomiyaha Urur siyaasadeedka Midnimo ayaa guddiga doorashada ka codsaday inay dhex dhexaad u noqdaan ururada siyaasadda,ayna ka dhabeeyaan himiladii loo asaasay ee ay u balanqadeen shacaka reer Puntland si loo gaaro miro dhalka halka la hiigsanayo.