GAZA( SPR):- Waxaa maanta magaalada Gaza soo gaaray madaxa xafiiska siyaasadda ururka Xamaas , Khaalid Mishcal, oo muddo lagu sheegay 45-sano ka maqnaa dalka.
Mishcal oo maanta oo Jimce ah soo gaaray dalka Falastiin ayaa waxaa ku weheliyey booqashadiisa xubno ka tirsan ururka Xamaas, waxayna ka soo galeen dhanka Masar.
Booqashadan oo lagu tilmaamay mid taariikhi ah ayaa waxaa lagu wadaa inuu halkaas khudbado ka jeediyo Khaalid Mishcal , iyadoo loo dabaal-degaayo sanad guuradii 25-sano ee kasoo wareegtay tan iyo markii dhidibada loo taagey ururka Xamaas.
Khaalid Mishcal ayaa noqday madaxa xafiisa siyaasadda ee ururka Xamaas sanadkii 2004, waxa uuna ku noolaa dalal badan oo ay ka mid yihiin, Jordan, Syria iyo waddamo badan oo Carab ah.
Booqashadan taariikhiga ah ee uu Khaalid Mishcal ku tegey dhulka Falaastiin ayaa timid maalmo ka dib markii ay joogsadeen dagaalkii u dhexeeyey Israil iyo Falastiin oo ay ku dhinteen tiro badan oo dad ah.
Mishcal waxa uu ka bad-baaday sanadkii 1997 isku day dil oo la rabay in lagu khaarijiyo oo ay soo abaabushay Israil.
