Minneapolis (SPR): Tan iyo goortii laga saaray xarakada Al-Shabaab magaalada Kismaayo ee xarunta gobolka Jubadda Hoose, ayaa waxaa isi soo taraayey afkaar kala gedisan oo ku aadan maamul u samaynta gobolada jubooyinka iyo waliba cida rasmiga ah oo ku haboon in ay dardar galisay maamulkaasi. Sidoo kale, qabsashada magaalada Kismaayo ayaa dhiirigalisay islamarkaana xoojisay fikir horay u jiray oo ah in maamul guud loo sameeyo gobalada Jubooyinka, xili inta badan gobaladaasi ay wali ku suganyihiin dagaalyahanada Al Shabaab ee ka soo horjeeda dowlada Soomaaliya. Magaalada Nairobi ayaa waxaa dhawaan kasocday kulamo looga arinsanayo maamul u samaynta gobaladaasi, waxaana kulamadaasi qayb ah isla markaana soo qaban qaabiyay Urur gobaleedka IGAD.

Waxaa sidoo kale dhawaan ka bilaabmay magaalada Kismaayo, qaban qaabo aad u balaadhan oo ku aadan shirweynaha maamul u samaynta Jubooyinka oo dhawaan la filaayo in uu ka furmo magaalada Kismaayo. Arimahaan oo idil ayaa kusoo aadayo xilli dowlada Somaaliya ay si toos ah uga biyo diiday qaabka loo wado maamul u samaynta Jubooyinka, iyadoona ku eedaysay dowlada Kenya in ay faragalin toos ah ku hayso arimahaasi.

Hadaba barnaamijka fadhi ku dirir oo ah barnaamij dood wadaag ah oo si toos ah looga daawado magaalooyinka Minneapolis iyo Saint Paul ayaa qabtay dood ku aadan maamul u samaynta Jubooyinka, iyadoo la iswaydiiyey su'aalo badan oo ay kamid yihiin; Yaa ka mas'uul ah maamul u samaynta Jubooyinka? Kaalin intee le'eg bay gacmo shisheeye ku leeyihiin khilaafadkani? Dastuur dalka Somaaliya muxuu ka qabaa gobolo isu taga oo maamul samaysa? Maxay tahay sababta ay dowlada ill gaar ahi ugu hayso arimaha Jubooyinka?

Barnaamijka qaybta kowaad: http://www.youtube.com/watch?v=kDfoXFUJkV4

Barnaamijka qaybta labaad: http://www.youtube.com/watch?v=KsnAPQFSvPo

Barnaamijkaan ayaa waxaa daadihinaaya: Abdulqudus Nur Salah (Donyale)