Dhahar (SPR): Wasiirka horumarinta degaanka iyo reer miyiga Somaliland, Dr. Maxamuud Saciid (Gacamay) ayaa xariga ka jaray mashaariic horumarineed, kuwaaso oo uu horay ugu balanqaaday shacabka gobolka Sanaag goortuu  xilka gudoomay. Mashaariicdaan ayaa waxaa kamid ah garoon kubadda cagta, dhismaha maxkamada darajada Kowaad ee gobolka, Sariibado, saldhigyo boolis iyo xarumo waxbarasho oo ay ka faa'idaysan doonaan shacabka gobolada Sanaag iyo Haylaan. Barnaamijyadan ayaa wada fulinayay maamulka S/land iyo Hay'ada SDC iyo Hay'ada Dhahar Construction Company oo madaxa ka yahay muwaadinka amaanta mudan Axmed Aadan Gurey.

Dr. Maxamuud Saciid (Gacamay) oo ka hadlay munaasabado xarig jar oo taxano ah, islamarkaana si toos ah u furay mashaariicdaan ayaa sheegay in ay ka go'antahay wasaaradiisu inay hormariso gobolka Sanaag, iyadoo dadwaynaha looga fadhiyo sidii ay u joogtayn lahayeen xarumahaan loogu deeqay oo ay shaqo iyo faa'idooyin kaleba ay ka helayaan.

Sidoo kale, mulkiilaha shirkada Dhahar Construction Company oo ah shirkada mashaariicdaan fulisay, mudane Axmed Aadan Guray ayaa tilmaamay in uu dedaal badan u galay mashaariicdani iyo kuwa kaloo horay loo fuliyey, isagoo u mahad celiyay shacabka gobolada Sanaag iyo Haylaan oo uu ku tilmaamay shacab u heelan waxqabad.

Degmooyinka mashaariicda laga fuliyey waxaa kamid ah Dhahar, Baraagaha-Qol, Booda-cad, Balibusle, Xingalool iyo Daar-Asalaam.

Shacabka gobolada Sanaag iyo Haylaan ayaa aad usoo dhaweeyey mashaariicdaan, iyagoo amaanay wasiirka wasaarad horumarinta degaanka iyo reer miyiga Somaliland, Dr. Maxamuud Saciid (Gacamay), kuna tilmaamay geesi waxqabad muujiyey. Suldaan Sahal Cabdi Cadde oo ka hadlay munaasabada xarig-jarka maxkamada sare ee gobolka Sanaag, ayaa ku tilmaamay wasiir Gacamay, halyeey mudan in lagarab istaago. Hadaladiisuna waxaa kamid ahaa, "taarikhda ayaa xusi doonta waxqabad wasaarada horumarinta degaanka iyo reer miyiga, siyaasi Dr.Gacamay'na waa siyaasiga kaliya horumar inoo keenay."

Magaalada Dhahar ayaa waxaa ka dhisan 17 naadiyo ee kubada cagta, iyadoo ciyaartoyda degmadani ay guulo farabadan ay soo ho'yeen ciyaaro ka dhacay Somaliland iyo Puntland'ba. Naadiyaha ugu caansan gobolka ayaa waxaa kamid ah naadiga idaacada SPR, White Horse, Telecom, Golis, New Galgala, Qunyar-Dega, iyo Naadiga Baraagaha-Qol. Tababaraha naadiga New Galgala, Maxamed Saciid Saalax oo goob-joog ka aha munaasabada xirg-jarka garoonka kubada cagta ayaa hambalyo u diray wasiirka horumarinta degaanka iyo reer miyiga Somaliland, isagoo sheegay in wasiirka iyo mulkiilaha shirkada Dhahar Construction Company ay yihiin shaqsiyaad daneeyo horumarka dhalinyarada.

Si kastaba ha ahaatee, mashaariicdaan ayaa ah kuwii u badnaa abadan laga hirgaliyo gobolada Sanaag iyo Haylaan, iyadoo dhamaantood la hirgaliyey inta uu xilka haayey Dr. Maxamuud Saciid Gacamay. Afkaar uruurin ay idaacada SPR samaysay ayaa laga dheehan karaa ififaalooyin ka tarjumaayo taageerida baaxada weyn ay shacabka gobolka Sanaag  u hayaan wasiirka degaanka iyo horumarinta reer miyiga Somaliland. Dr. Gacamay ayaa sidoo kale balan qaaday mashaariic kaloo hor-leh oo ay ku jiraan jaamacad iyo ceelal. mashaariicdaan iyo waxqabadkaan la taaban karo ayaa noqonaayo kuwa uu ku hananaayo wasiir Gacamay taageerida shacabka Gobolada Sanaag iyo Haylaan.

SAWIRADII FURITAANKA GAROONKA KUBADA CAGTA EE DHAHAR

DAAWO SAWIRADII MAXKAMADA DEREJEDA KOOWAAD EE DHAHAR

HALKAAN KA DAAWO SAWIRADII SOO DHAWEYNTII WASIIRKA EE DEGMADA DHAHAR

HALKAN KA DAAWO SAWIRADII FURITAANKA ISKUULAADKA BARAAGAHA QOL IYO BALI BUSLE