Garoowe(SPR) Magaalada Garoowe ee caasimada Puntland maanta waxaa soo gaaray xubno ka tirsan isimadii Puntland uga qayb gelayey shirka odoyaasha dhaqanka Soomaaliyeed uga socda Magaalada Muqdisho ee caasimada dalka.

Barqanimadii maanta ayaa la shaaciyey in ay tegayaan waxgaradka ka socda Puntland ee shirkaasi ku jiray 10-maalmood ee tegay kuwaasi waxyaabo badan eegay.

Garoonka diyaaradaha caasimada Puntland ee Garoowe waxaa soo gaaray xubno uu ka mid yahay Suldaan siciid Maxamed Garaase kuwaasi oo ka degay garoonka goor barqadii maanta ah.

Waxaa jira xubno kale oo ka tirsan isimada Puntland kuwaasi oo weli ku sugan Magaalada Muqdisho ee caasimada dalka Soomaaliya, iyagoo la filayo in ay maalmaha soo socda soo gaaraan deeganada Puntland.

Ma jirto wax hadal ah oo ay siiyeen warbaahinta Maxaliga ah iyo weliba kuwa caalamiga ah toona, waxaana arintaani ku soo beegamaysaa xili Maamulka Puntland uu ku dhawaaqay in uu dhaliilsan yahay Tastuurka cusub ee Soomaaliya loo samaynayo.