Muqdisho(SPR)Shirkii wadatashiga loogu magacdaray ee uu wajigiisa labaad ka soconayey Magaalada Garoowe ayaa maata la soo gabagabeeyey iyadoo ay kasoo bexeen qodobo badan oo la isla meel dhigay.

Qodobada la isku raacay waxaa ka mid ah:-

waxaa la isku raacay in wax lagu qeybsado awood qeybsiga nidaamka 4.5

in baarlamaanka lagu soo doorto qaacidada 4.5 afarta Sano ee soo socota.

in xildhibaannada la yareeyo oo laga dhigo 225 mudane.

in nidaamka 4.5 uu shaqeeyo afarta sano ee soo socota.

In maamulada ay soo xushtaan ergooyinka iyada oo wax ay ka weydiinayaan Qabaa’iladooda ama wax garadkooda & Deegaanada aan maamul ka jirin in Qabaa’iladooda ay u soo doortaan cidii matali laheyd.

in dastuurka ay anisiyaan Ergooyin gaaraya ilaa 1000.

Qodobaadaas oo idil waxa ay ahaayeen kuwo la wada saxiixay waxaana qalinka ku duugay Madaxda sar sare ee Dawladda KMG Soomaaliya, Maamulka Puntland, Gal-Mudug iyo ururka Ahlusuna.

Madaxdii halkaasi ka hadashay waxaa ka mid ahaa Madaxweynaha Dowladda KMG Soomaaliya Shariif Sheekh Axmed iyo Madaxweynaha Maamulka Puntland C/raxmaan Maxamed Maxamuud Faroole iyo masuuliyiin kale oo aad u fara badan.

Madaxweynaha Dowladda KMG Soomaaliya Shariif Sheekh axmed oo halkaasi qudbad dheer ka jeediyey ayaa waxa uu uga madahceliyey Maamulka Puntland Ciidankeeda iyo Shacbkeedaba sida quruxda badan oo ay uga qeyb qaateen gacan buuxdana uga geysteen shirkan waxa uuna sheegay in uu guul ku dhamaaday shirka.

Dhanka kale Madaxweynaha Maamulka Puntland oo isna Goobtaasi ka hadlay ayaa waxa uu sheegay in kulanku uu guul ku dhamaaday balse isagu marnaba uusan ku qanacsanayn nidaamka 4.5 balse sida uu sheegay uu tanaasulay.

Madaxweyne Faroole ayaa sidoo kale ka dhawaajiyey in nidaamka 4.5 lagu dhaqmayo 4-sano oo kaliya lagana guuri doono wixii wakhtigaas ka danbeeya.